கறுப்பு மண்ணில் (மனதால்) கருகியவர் :(

ஆகஸ்ட் 1999 மண் எண்ணெய்யில் தம் வாழ்வினை மண்ணுக்கு கொடுத்த அந்த பெண் கடைசியாக சொன்ன வார்த்தைகள் மரண வாக்குமூலமாக பதியப்பட்டிருந்தாலும்,கூட இந்தளவுக்கு தண்டனை கிடைக்கும் என்று யாரும் எதிர்பார்த்திருக்க மாட்டார்கள் !

”நான் கருப்புங்கறதால எங்க வீட்டுக்காரருக்கு பிடிக்கலை மனசு ஒத்துவரலை தினமும் சண்டை போட்டுக்கொண்டிருப்பதற்கு பதில் நான் தற்கொலைக்கு முடிவெடுத்துவிட்டேன்” என்று அந்த பெண் வாக்கு மூலத்தோடு தன் மூச்சை நிப்பாட்டிக்கொண்டாள்!

சரியாக கிட்டதட்ட ஒன்பது வருடங்களுக்கு நேரிடையாகவும்,மறைமுகமாகவும் தற்கொலைக்கு தன் மனைவியை தூண்டி விட்ட காரணத்திற்காய் கணவருக்கு இரண்டு வருட கால சிறைத்தண்டனை அளித்த மதுரை சென்னை உயர் நீதிமன்ற மதுரை கிளையின் தீர்ப்பினை உறுதி செய்து, உச்ச நீதிமன்றம் தீர்ப்பு வழங்கியிருக்கிறது.

பெரும்பாலும் இது போன்ற தற்கொலை சம்பவங்கள் நிகழ்ந்தாலும் கூட அவ்வளவாக வெளியே வராது அல்லது வேறு எதாவது காரணங்களில் கரைந்து போய்விடும்!

எப்படியோ! தற்கொலை என்ற அவசர முடிவை அந்த பெண் எடுத்துக்கொண்டாலும் கூட எதிர்கால சமூகத்தில் இது போன்றதொரு சம்பவம் நிகழாமல், நிகழ்ந்தால் தண்டனை கட்டாயம் உண்டு என்ற செய்தியை தந்து சென்றிருக்கிறார்!